Contoh Wayang Kulit Untuk Hiasan Dinding kw.2

Contoh Wayang Kulit kw.2

Contoh Wayang Kulit kw.3

Contoh Wayang Kulit kw.1

PRABU NAHUSA part.2

Ing sawijining dina prabu Nahusa prisa Bathari saci, pameswarine Bhatara Indra. Ndulu sulistyaning warnane sang Bathari, Prabu Nahusa kegiwang panggalihe. Kagawa saka bangeting kasmarane marang Bathari saci, Prabu Nahusa nganti kawiyos pangandikane mangkene : “Bathari saci punika rak prameswarinipun Bathara indra. Batahara saci inggih dados wenang kula. Sahrene kula inkang nguwaosi kaindran, nggentosi kalenggahanipun Bathara Indra, Bathari saci inggih lajeng dados wewenang kula. Awit saking punika, heh para Dewa, Bethari saci jengandika timbali kadhawuhan marak ing ngarsa kula sapunika ugi.”
Pangandikane Prabu Nahusa kang mangkono mau kepireng lamat lamat dening Bathara saci. Kanti pengalih geter , sang Bathari nuli lumayu menyang papan padunungane Maharsi Wrehaspati, nyuwun pangayoman. Maharsi Wrehaspati iku minangka paran parane Bathara Indra, lan uga dadi gurune para Dewa.
“Dhuh Sang Maharsi. Mugi wontena kapareng paduka tansah paring panganyoman dhateng kula, sampun ngantos kula dipun cecamah jinamah dening prabu Nahusa. Kersaa paduka ngendikani dhateng prabu Nahusa bilih kula punika dereng dados randa, lan kasetyan kula dhateng Bathara Indra sakelangkung ageng, ngetepi patibrata. Setya kula dhateng Batahara Indra boten bade saget luntur ing salami-laminipun,”mangkono ngendikane Dewi saci marang Maharsi Wrehaspati.
Maharsi Wrehaspati : “Manahwi kepareng atur pamrayogi, padhuka sampun kagungan panggalih ajrih dhateng Prabu Nahusa, Jer piyambakipun punika bebasan namung sapanginang anggenipun nguwaosi kaindran. Boten dangu malih Bathara Indra tamtu badhe kondur.” Pangandikane Maharsi Wrehaspati kandheg, amarga kesaru tekane para dewa kang ingustus Prabu Nahusa nimbali Batahari saci. Lakune ora oleh gawe, jalaran digondeli dening Maharsi Wrehaspati. Para dewa nuli bali menyang ngarsane Prabu Nahusa, ngaturake asile dinuta. Prabu Nahusa : heh para Dewa, kanthi pawadan punapa kemawon anggenipun Maharsi Wrehaspati nggondheli Bathari saci. Punapa anggen kula kepengin andarbeni Bathari saci punika nama murang krama.”
Naskah : Ki Nayantaka
Dikutip : Panjebar semangat

PRABU NAHUSA part.1

Prabu nahusa narendra apengawak prabata setengah ditya gung aluhur, gagah prakosa, prawira sembada. Prabu nahusa sekti mandra guna jayeg ngalaga, mula banjur minangka agul-aguling para dewa. Nalika semana yen sawayah-wayah ana parangmuka kang nekani kahyangan kaindran, Prabu Nahusa kang dadi senopatine. Nanging wektu iku Bathara Indra lagi nandhang gerah bingung, jalaran sapatine Asura wreta rumangsa luput, jalaran Bathara indra wis nindakake Brahmana hatya. Yaiku Mrajaya asura wreta, mitrane sinara wedi. Dadi Bathara indra nandhang dosa rong prakara. Kang sepisan mrajaya Brahmana trisah, kapindo mrajaya Brahmana mitrane dhewe yaiku Asura wreta . Jalaran giris miris marang wohing panggawe ala rong prakara kang mentas ditindakak, Bathara indra tansah goreh-rongeh, ora jenak panggalihe, mulane benjur oncat saka Kaindran tanpa ana dewa kang priksa. Ing saoncade Bathara indra, kahanan ing marcapada rusak, jalaran ketiga ngerak, ora tau ana udan, jagad ngalami ketiga dawa tanpa wasana. Tetuwuhan padha garing, manungsa lan sato kewan akeh kang mati. Wong wong kang isih urip padha nggresah, jalaran larang sandhang pangan. Ing kaindran, para bathara bathari, haspara haspari uga nggresah susah, rumangsa ora darbe pangayoman. Awit saka iku para dewa banjur nganakake parepatan, nggunem sapa kang pantes gumanti, lan kang prayoga jinunjung dadi ratu ana ing kayangan kaindran. Pepuntoning rembug para dewa padha saiyeg saeka kapti njumenengake Prabu Nahusa minangka gegantine Bathara indra. Ing sakawit Prabu Nahusa ora kersa ngratoni para Dewa. Ngendikane: ‘’Dhuh para Dewa sadya, kula mboten kadugi ngratoni Kaindran, jalaran kula boten darbe kalangkungan kados Bathara indra.’’ Para Dewa: ‘’Manawi paduka lenggana ngratoni para Dewa, gek lajeng sinten ingkang mungguh nggentosi kaleggahanipun Bathara indra. Para Dewa sampun sami golong giling milih paduka minangka pngayoman. Manawi wonten ruwet rentenging kawontanan ing Kaindran, temu para dewa badhe asung pambiyantu dhateng paduka. Mila sumangga nindakaken darma, mangun suka dhateng taman nandana, utawi dhateng redi redi utawi dhateng wana wana dipun dherekaken para Dewa ingkang dipun pangarsani dening Bathara Naradda.’’

Amarga saka banget panggubel lan panggujege para Dewa, wasana Prabu Nahusa kersa jumeneng ratu ing kaindran, angratoni para dewa. Ing sakewit Prabu Nahusa becik anget olehe mranata lan rumeksa tata tentreming kaswargan, nganti nampa pangalembana saka para dewa. Tindake adil ora tau mikolehake diri pribadine. Nanging suwe-suwe panggalihe Prabu Nahusa ketuwuhan rasa angkara murka, saya lawas saya ngambra-ambra tumindak ing sakarsa karsa, mburu senenge dhewe. Para dewa kang cacahe mayuta-yuta ora dipaelu, mung pijer ngopeni senenge dhewe. Panggalihe Prabu Nahusa kebekan watak pumpung. Mumpung kuwasa, mumpung bisa tumindak sakarsa karsa, mumpung diwedeni dening para Dewa.

Wayang kulit hiasan dinding